Settimu iornu da nuvena

SETTIMO GIORNO

Fora dunca la citati

riflittennu iddu sapia

una grutta a ddri cuntrati

cussi dicci a Maria:

Ccà vicinu c’è na grutta

benchi vili e aperta tutta,

si vuliti pirnuttari

ntra sta grutta vi cci portu.

Nun vi pozzu, o spusa, dari

autru aiutu, autru cunfortu.

Maria allura ubbidienti

mustra d’essiri cuntenti.

Cussi nsiemi s’avviaru

pri ddra parti a pocu a pocu.

Già la grutta ritruvaru

ma assai poviru è lu locu.

E cu tuttu allegri stannu

sempri a Diu ringraziannu.

Tutti l’Ancili biati

chi pri via l’accumpagnaru

cu splenduri inusitatu

chidda grutta circunnaru.

San Giuseppi li vidia

e, guardannuli, gudia.

Oh! Pinsati ch’alligrizza

di ddi santi amati spusi

ca, gudennu sta biddizza,

sunnu allegri e gluriusi!

Doppu aviri tanti stenti

a sta vista su cuntenti.

A stu lumi gluriusu

risplinnia la gran Signura

comu un suli maistusu

chi v’inciamma e vi nnamura.

E Giuseppi cunsulatu

resta allegru e inciammatu.

Cussì ardennu in duci focu

S. Giuseppi cu Maria

canusceru ca na ddru locu

Gesù nasciri duvìa.

Ntrà lacrimi d’affettu

criscia focu a lu so pettu.

Ma vidennu poi Maria

ca assai lorda era la grutta

comu matri amata e pia

nun la po’ vidiri brutta,

e na scupa ddra truvannu,

cu umiltà la ia scupannu.

St’umiltati in riguardari,

di Maria lu so spusu

cuminciau puri a scupari

ma di l’ancili è aiutatu.

E na un nenti chidda grutta

resta bedda e netta tutta.

 

Questo sito usa Akismet per ridurre lo spam. Scopri come i tuoi dati vengono elaborati.